یاناقین گؤیچه کدیر ، گولدن لاله دن
سنین نه گؤزلدیر قارا گؤزلرین
منی حفظ ائله سین مروته گلسین
ووروبدور جانیما یارا گؤزلرین
...
عشقین خسته سینه چکدیرمه جفا
رحم ائله آ ظالیم ، گل بیر اینصافا
سندن اولا بلکی منه بیر شفا
ائیله یه دردیمه چارا گؤزلرین
...
داغلارین که کلیکی ، آلا گؤز نیگار
شمشیر بو وصفینه یورولماز یازار
قوجالمیشام ، عاشیقام ، گؤرمه گوناهکار
قویما چکیر منی دارا گؤزلرین
دده شمشیر
دلی کؤنول, مندن سنه امانت,
دئمه بو دونیادا قالیم یاخشیدی.
بیر گون اولار, قوحوم, قارداش یاد اولار,
دئمه ئولوسوم وار, ائلیم یاخشیدی.
بیر مجلیسه وارسان اوزونو اویمه,
شیطانا باج وئریب, کیمسیه سؤیمه,
قوتلی اولسان دا یوخسولو دؤیمه,
دئمه کی, زورلویام, قولوم یاخشیدی.
قوچاقدان اولوبسان, قوچاق اولگونان,
قادادان, بالادان قاچاق اولگونان,
آشیق اول, جومرد اول, آلچاق اولگونان,
دئمه, واریم چوخدور, پولوم یاخشیدی.
خسته قاسیم, کیمه قیلسین دادینی?
جانی چیخسین, اوزو چکسین اودونی,
یاخشی ایگید یامان ائتمز آدینی,
چونکی یامان آددان اولوم یاخشیدی.
خسته قاسیم
سنينله نور ساچار عقليم، كماليم
سنسيز گؤيده بولود، داغدا چن اوْللام.
سنينله آچيلار فيكريم، خياليم
گولمه سن كدرلي، گولسن شن اوْللام.
آز دئييل دوستلوغون قدريني بيلن
دوستا دوست كيمي باخ، دوست كيمي ديللن
آنجاق دوشمنيمله دوشمن اوْلما سن
دؤزن هر دؤيوشده تكجه من اوْللام.
آيلاري، ايللري سالسام دا يوْلا
ياشارام كؤنلومون اؤز آرزوسويلا
بير ذره شفقله، بير دامجي سويلا
بير قاريش توْرپلقدا بير چمن اوْللام.
سيناق مئيدانيندا سئچيلر انسان
ائنيشلر، يوْخوشلار گلمه سين آسان
بيرجه سن آديني تميز ساخلاسان
اولان اولوب، كئچن كئچيب بلكه ده،
ايندي داها كؤورلمه يين يئري يوخ.
عؤمروم بويو بئله گليب منيم كي.
اوّليندن بيري واردي، بيري يوخ!
اوزاقدايدي من ايسته ين اوجاقلار،
اوره ييمدن گليب گئچدي سازاقلار،
آتالييدي،آنالييدي اوشاقلار،
بيزيم ائوده بيري واردي،بيري يوخ.
گؤزلريمه دولدورموشام ياغيشي،
بير كؤينكده چيخارميشام من قيشي.
شالوار-پئنجك گئيينردي تاي-توشوم،
منده ايسه بيري واردي، بيري يوخ.
اوزوم گولدو طلبه يم دئينده،
سيخيليرديم دوست پئنجه يي گئينده.
معلّمله ديل تاپا بيلمه ينده
قيمتمين بيري واردي، بيري يوخ.
قلبيم ياندي ايلك سئوگيمدن،عشقيمدن،
دارا دوشدوم،ال اومماديم هئچ كيمدن
مجلسلرده جان دئييب، جان ائشيدن
دوستلاريمدان بيري واردي، بيري يوخ.
من اوردويا نه لر گؤروب گئتميشديم،
اوره ك آليب، اوره ك قيريب گئتميشديم.
ايكي قيزا كؤنول وئريب گئتميشديم،
قاييداندا بيري واردي، بيري يوخ.
اوزاق گزدي عمي، دايي، بي بي لر،
سؤز آراسي منه "ائولن"دئديلر
نيشان اوچون ايكي شئي ايسته ديلر
منده ايسه بيري واردي، بيري يوخ.
واخت گله جك، بو گونو گؤره جك سن،
چوخ سوالا گؤزونو دؤيه جك سن.
واخت گله جك سن اؤزون دئيه جك سن
دئيه جك سن:«بيري واردي، بيري يوخ!»
شاعير:نصرت كسمنلي
نه بيله يديم بو سئوگينين سونو يوخ
نه بيله يديم دونيا بئله دؤنه جك.
نه بيله يديم سئوگي آدلي بو قوناق
ايكيميزين آراميزدا اؤله جك...
اولو سئوگي گؤيدن يئره ائندي مي،
نه داياندي يولوموزون اوستونده؟
بو محبّت سويودوقجا سن دئمه،
جان وئريرميش قولوموزون اوستونده..
هر گؤروشه سورونوردو آياقلار..
او چمنلر-بير باهارليق چمني.
دوداقلاري يانديراندا دوداقلار
اوره ييميز اوشويورموش،دئمه لي.
ايلنجه لر قويمادي كي،گؤز آچاق؛
هر ايسته يي بيز بئله جه بيتيرديق.
پاييز گلدي توي بايراملا،بيز آنجاق
يارپاق-يارپاق گونوموزو ايتيرديك.
شيرين اولدو يالانلارين زهري،
حقيقتيگيزله ميشيك هميشه
سئوگيليلر اوياق آچدي سحري،
بيز آخشامي گؤزله ميشيك هميشه..
يوخو گؤردوك..گاه قورخولو،گاه دا شن،
بوغدو بيزي ترددودلر آخاري.
يوخولاردا اللر گؤردوك بيرله شن،
ها يوزدوقسا هجران اولدو آخيري..
نه بيله يديك بو سئوگينين سونو يوخ،
نه بيله يديك دونيا بئله دؤنه جك.
نه بيله يديك سئوگي آدلي بو قوناق
اوزوموزه باخا-باخا اؤله جك...
‹نصرت كسمنلي›
چوخ کچمیشم بو داغلاردان
دورنا گوزلی بولاقلاردان
ائشیتمیشم اوزاقلاردان
ساکت آخان آرازلاری
سینامیشام دوستی، یاری ...
ائل بیلیرکی، سن منیمسن
یوردوم، یووام، مسکنیمسن
آنام، دوغما وطنیمسن!
آیریلارمی کونول جاندان؟
آذربایجان، آذربایجان!
باشینا دوندیگیم گل اوزلی صونا!
عمریمین ایلک چاغی یادیما دوشدی
شاعرلر وطنی، بیزیم طرفلر
طرلانین اویلاغی یادیما دوشدی
اوخویون قلبیمی داستان ایچینده
اورک دوگونمزمی آستان ایچینده؟
پاییزین فصلنده، بوستان ایچینده؟
شامامانین تاغی یادیما دوشدی
توکولدی کاغذه سینه مین سوزی
او آنا یوردومون اوجاغی، گوزی
جیرانین دوروشو، دورنانین گوزی
ککلیگین آیاغی یادیما دوشدی
هانی آت سوردیگیم بوراندا، قاردا
گزدیم عاشق کیمی مین بیر دیاردا
گولوب اوینادیغیم طویدا، ماغاردا
قیزلارین قولباغی یادیما دوشدی
گوگلره باش چکیر گویه زن داغی
آخشام آچیق اولور آیین قاباغی
بیزیم گلینلرین بایرام قاباغی
فسه لی یایماغی یادیما دوشدی
سن بیزیم ائللرین روحینا بیرباخ!
بیزدن اینجیمه میشن بیر عزیز قوناق
نشانلی قیزلارین گوروشدن قاباق
تئلینی سایماغی یادیما دوشدی
وورغونون خیالی گزدی آرانی
گوزومده اوینادی داغین بورانی
قیشین بوز قاتیغی، یایین آیرانی
پاییزین قایماغی یادیما دوشدی
صمد وورغون
نه واخت چيچک گؤرنده من
خیالیما سن دوشرسن
بير گول سئويب درنده من
خياليما سن دوشورسن
اؤزومده بيلميرم ندن
گئجه گوندوز فيکريمده سن
هر سحر گونشدن ائرکن
خياليما سن دوشورسن
دومانلی داغلار گؤرنده
چایلاری چاغلار گؤرنده
یاز دونلو باغلار گؤرنده
خياليما سن دوشورسن
بوراخماییر پاییز منی
یازا یاخین گئدنمیرم
طبعیم یئنه بوزا دونوب-
سوزه یاخین گئدنمیرم
فلک الدن آلیب دمی
قیریلیبدیر کونلوم سیمی
قولو باغلی آشیق کیمی
سازا یاخین گئدنمیرم
په ته یی بوش آری یام من
داها چتین یارییام من
جاوان ایکن قارییام من
یوزه یاخین گئدنمیرم
علی کویرک زامان گلیب
کونلومه آه-آمان گلیب
آرامیزی ووران گلیب
سیزه یاخین گئدنمیرم
علی طالبی قیه باشی