آچار اولام قیفیللانمیش دیللره
ملهم اولام قابار چالان اللره
جانلا،باشلا قوللوق ائدم ائللره
اوندا شیرین اولار بو حیات منه
یولداش اولام آرزوسونا چاتانا
اؤلوم اولام اؤز یوردونو ساتانا
زیندان اولام دوست آراسی قاتانا
اوندا شیرین اولار بو حیات منه
قانادلی قوش اولام گؤیلره اوچام
گئجه¬لرآی اولام یئره نور ساچام
بیر نفر دئمییه چیلپاغام آجام
اوندا شیرین اولار بو حیات منه
جوهر اولام ائللر قانون یازالار
کولونگ اولام معدنلری قازالار
یایلاق اولام داریخانلار گزه¬لر
اوندا شیرین اولار بو حیات منه
قوناق گئدم اوزاق ائله اوبایا
ائللر منی برکده، بوشدا سینایا
یاخشی اولسام، پیس¬ده اولسام تانییا
اوندا شیرین اولار بو حیات منه
هر یئرده وار اوجا ظولمون بناسی
سیلاحلارین باتا سسی صداسی
گؤزللشه یوردوموزون نماسی
اوندا شیرین اولار بو حیات منه
قویام خوشبختلیگین تمل داشینی
آغلایان گؤزلرین سیلم یاشینی
بوز دومان آلماسا داغلار باشینی
اوندا شیرین اولار بو حیات منه
شعر:سلیمان ثالث
علیرضابین ایکینجی شعری
ائديب چينچين سيه زلفون مني ديوانه اي دلبر
گتور زلف پريشانه وريم من شانه اي دلبر
نگاه نرگس مستون هامي اهل خراباتي
سالوب صحرايه مجنون تك ائديب ديوانه اي دلبر
شراب لعل شيرينون، ائديب سرمست عشّاقي
اوزون ساقي، گؤزون ساغر، لبون پيمانه اي دلبر
يوزون لاله، گؤزون قاره، لبون غنچه، عرق ژاله
اوزون گلسن، خطون سنبل، خالون پروانه اي دلبر
ز بس فكر و خيال ائديم جمالونده خط و خاله
مني آشفته افكاريم گتوردي جانه اي دلبر
ملامت ائتمه گر دوشدوم كمنده خالوي گورجاق
سوسوز، آج قوش، دوشر دامه، گوره گر دانه اي دلبر
گئچوب هر عالم عارف سنون كوي وصالونده
كنشت و دير و مسجددن بو گون رندانه اي دلبر
ائديبدور آيريليق داغي غم و محنت گرفتاري
خيال وعدة وصلون اولوب افسانه اي دلبر
اولوب شان شان سينيق گويلوم سنون درد فراقونده
بسان لعل ميگونون دؤنوبدور قانه اي دلبر
گؤزوم قان ياش توكر جانا سنون هجرنده رود آسا
هاچان وصلون اولار ممكن من نالانه اي دلبر
اويم ويرانهدور سنسيز صفاسي يوخدي، لطفيله
قدم قويسان بو ويرانه اولار كاشانه اي دلبر
بساط عشقي تا قوردوم يقين بولدوم كي عالمده
دونوب هر آشنا منله اولار بيگانه اي دلبر
قدم قويسان بو اقليمه عزيزيم «فاني» مسكين
فدا ايلر سرو جانين سن جانانه اي دلبر
فانی تبریزی
بو شعری عزیز دوستوم علیرضابی منه گوندریب
یاشاسین
آلدی آپاردی دلبر مهپاره گویلومی
سالدی بلا و محنته آواره گویلومی
آشدی حجابی زلفی توکوب مه جمالنه
سالدی کمند طره ی طراره گویلومی
مژگان اوخون کمانه قویوب وردی قلبیمه
ائدی نشانه اوخلارا بو یاره گویلومی
دار وفاده خال و خط و زلفی بولمورم
سالدی نه نوعیله ره دلداره گویلومی
لب سرینی اولمده اگر فاش قیلمارام
آگاه ائدیبدی لطفله اسراره گویلومی
فکر و خیال وصلله دل پاره پاره دور
هجرانیدن قوتارمادی صد پاره گویلومی
تا بیر گلیله مونس اولام دور روزگار
توش ایلدی جفائیله مین خاره گویلومی
بیع و شرایه قویدی منی ناقد زمان
یوسف کیمی چکوبدیله بازاره گویلومی
زخم خدنگ دشمنه وار چاره ای عزیز
زخم زبان دوست ائدیب یاره گویلومی
اسرار عشقی فاش ایله فانی دئدیم نولور
منصور تک چکلله دئدی داره گویلومی
فانی تبریزی