گل، اَل- اله توتوب گئدک،
گئدک بیز اولمایان یئره.
هر دردی اونودوب گئدک
دردیمیز اولمایان یئره
بورادا قویاق اؤزوموزو،
بو قیریشان اوزوموزو
بو کؤهنهلن سؤزوموزو
گئدک سؤز اولمایان یئره
بیر کیمسه توتماسین خبر،
گَل، چیخیب گئدک بیر تَهَر
بو ائو، بو کوچه، بو شَهَر،
بو دنیز اولمایان یئره.
... آتام اوغلو، آز چابالا،
سن دئین چتین تاپیلا،
بو رامیزی کیم آپارا
بو رامیز اولمایان یئره؟!..
رامیز روشن
گؤزلرین گؤزومه ساتاشان زامان
٬بیردن اورییمه قالاندی سؤگی.
باخیشین هورولدو باخیشلاریما
٬گؤزوندن گؤزومه جالاندی سؤگی
اویمادیم شؤهرته اویمادیم آدا٬
اییلدیم تانیشا اییلدیم یادا.
دئدیم بو وفاسیز فانی دونیادا٬
هرشئی گئدر تکجه قالاندی سؤگی.
توتاق دانیشماخدان باقلانسین دیلیم٬
آدین اورگیمدن نه سایاق سیلیم؟
دوزی٬بیلنمه دیم منیم سئوگیلیم
٬نه چون اورگیندن تالاندی سئوگی!
عشقه٬محبته قابل اؤلماسان٬
ایستکدن دانیشما کامیل اؤلماسان.
کؤنلوم٬دئمیشدیم کی عاقیل اؤلماسان
٬واریوخون الیندن آلاندی سؤگی.
قانلی گؤزیاشیمی دؤندردین سئله
٬یاندیردین کونلومی تاپشیردین یئله.
ناصحم سئوگیلیم دوشوندوم بئله٬
یالاندی محبت٬یالاندی سئوگی!
من جنتی پوچ بیلیرم
گولوم سنین قوجاغیندا
بیهوش اولوم قوی لال اولسون
دیلیم سنین قوجاغیندا
کسسه یولوم قضا قدر
عومروم گونوم گئتسه هدر
منه خوشدو چکسم اگر
ظولوم سنین قوجاغیندا
یا وعده نی بویازا وئر
یا بهمنی گودازا وئر
هئچ اولماسا اجازا وئر
اولوم سنین قوجاغیندا!
دویغومون چیچگی آچیلان زامان
منی ترک ائدیر سن الیندن آمان
اوره گیم دولوبدور گؤزه لیم یامان
سنی آختاریرام ، سندن خبرسیز
ایستیرم اونودام ، اوره ییم قویمور
نقدر دانیشسام، یئنه ده ،دویمور
آلیشیب ایچه ریم، ابدا سویمور
سنی آختاریرام سندن خبرسیز
سؤزومو دئمه یه یوخ چیخار منده
یلیرم بیلیرسن گؤزه لیم ،سنده
دؤنوبدو تئللرین سنین کمنده
باغلاییب قولومو سندن خبرسیز
جان آتیرام دار قفسدن اوچماغا
ال اله توتوشوب ، بیرگه قاچماغا
نه اولار چیخایدیم ،بیر اوجا داغا
سنین خیالینلا ، سندن خبرسیز
دویغوسوز یاشاماق ایگیده ،عاردی
داغلارین باشیندا گؤرونن قاردی
بودونیا باشیما ، گؤر نئجه داردی
سنله یاشاییرام، سندن خبرسیز
اؤتوبدو عؤمرومون جاوان چاغلاری
دویونجا گزمه دیم باغچا باغلاری
چکدی اوره ییمه چارپاز داغلاری
زمانه غفیلدن ،سندن خبرسیز
ایندیکی عؤمرومون سون باهاریدی
ساچیمدا آغ توکلر، عؤمور قاریدی
هامی اؤز یاریندان، یامان یاریدی
یاکاموز قوجالدی ، سندن خبرسیز.
حبیب ساسانیان
گؤزوم آیدین تانریمین اؤزی ینه گولدی منه
یاریمین گلمه یینی سانکی روا بیلدی منه
گؤزوم آیدین ینه ده دوست الینی آلدیم اله
تار گئجه م اولدی ایشیق تا که سحر گولدی منه
گؤزوم آیدین نه غمیم وارگله جک گونلریمه
اوره ییم شوقا گلیب ؛اولما تازا ایلدی منه
گئجه گوندوز نفسیم تازه لنیپ شاد یاشیرام
شعریمین بندینی آشدیقجا شیرین دیلدی منه
گؤزوم آیدین ینه ده باخدی خمار گؤزلو؛ خومار
کونلومون صاحیبی اول باغچادا بولبولدی منه
ینه جانلاندی جانیم آب حیات وئردی دئدیم
یوسفیم ایتمیشدی خوش خبری گلدی منه
شمع لر یاندیقیجا ناز ائله دی پروانه
اوندا گوردوم دایانیب (تارلا) سی تئل تئلدی منه
تارلا